滿江紅小甜甜 (已結業)

同老公行完街，然後佢就帶左我去灣仔方向駱克道搵食。而加先知道，原來呢度街係咁多食肆。老公知我鐘意食辣，佢就帶我去食川菜。餐廳門口同環境有中國特色，古色裝修，木枱木櫈。職員安排我哋坐卡位，座位寬闊，坐得好舒服。打開餐牌，都見有好多麻辣川菜系列。唔食得辣，可以揀小辣或者唔辣嘅菜式。老公唔食得辣，所以佢就按自己口味發辦。最後我哋就叫左涼菜，煲仔，兩款小炒同兩杯飲品。麻辣涼粉：涼粉口感好爽，佢裡面夾左D好煙韌嘅薯粉，唔食得辣會覺得辣，撈埋上面D蔥同蒜一齊食，好香。麻辣雞煲：老公唔食得辣，所以叫左小辣。雞煲用煲仔上，下面仲有個火熱住，keep住溫度，唔駛驚凍左d油凝結左。雞煲辣辣地幾惹味，雞下面有白蘿蔔、薯仔同青瓜，吸晒D麻辣湯，辣味十足，我就幾鐘意。乾煽四季豆：小炒有鍋氣，但又唔會太多油，呢個小炒唔辣。四季豆炒得入味爽口，加埋肉碎送飯就比較開胃。回鍋牛展：用回鍋肉煮法，只係轉左係牛展。呢個小炒叫左小辣，牛展加埋尖椒同洋蔥一齊炒，夠香夠味，好夾。牛展麻辣味，辣辣地，幾好食。西瓜汁：冰唔多但都夠冰凍，都大杯架。木瓜奶：無冰，連糖都無唔駛加，啖啖都係木瓜同奶，真材實料，唔錯。