愛甜心甜品 (已結業)

是晚食完晚飯，同朋友徒步由尖沙咀走到佐敦，口痕想食糖水滋潤下，眼見呢間甜品店幾光猛，選擇款式多又大路，遂入內試試。晚上九點多來到，人流不算太多，靜靜地的環境同朋友傾計都頗愉快！款式雖則大路，不過選擇起上黎都依然困難！😂花朱蕉展 - 以朱古力綿綿冰、香蕉及椰果製成！冰感十足，綿綿冰打得細密，朱古力味又濃郁。椰果質地軟綿且有咬口，香蕉切得薄薄，入口香甜！蓮子百合馬蹄露 - 涼涼的天氣飲下一啖熱糖水，感覺份外舒喉溫暖！飲落清甜，馬蹄爽口，蓮子煲得夠軟稔，容易入口。