Edenfa (已結業)

之前朋友約我試下呢間半自助晚餐，佢話同事食過唔錯。聽佢講啲主菜係整得幾好食同埋出面自助攞嗰啲前菜都出色咁就一於陪佢去try try 入到去見到個環境都幾好，地方唔算大，不過氣氛同格局係舒服嘅。咁坐低冇耐，就出去自助bar攞前菜啦，除咗有沙津，火腿，海螺等等基本野，仲有一啲特色海鮮料理：個人最鐘意就係呢三款，下面微烤吞拿魚刺身配蟹籽做得唔錯，外層烤得香口，內裡鮮甜嫩滑，右上個蝦都出色，啲香料配搭加埋彈牙嘅開邊蝦，非常開胃，而左上嗰杯睇落平平無奇，未食之前我以為係普通千島醬配車厘茄，點知上面原來係一絲絲蟹肉配上一種酸酸甜甜又creamy嘅醬汁，意料之外嘅好食！食完前菜就食主菜，朋友揀咗牛扒而手我就揀咗燴牛面頰。牛燴得非常入味，咸度啱啱好，口感又軟稔，仲好有牛嘅鮮味！而薯蓉creamy之餘又有保留少少大粒啲嘅薯蓉，口感好有層次，如果薯蓉有得添就好喇哈哈 最後食甜品，佢每份蛋糕上都有唔同pattern嘅一小塊朱古力，都略見心思，熱情果慕絲幾清甜醒胃，值得一試！