萬花紅火鍋酒家 (已結業)

成班同事要等夜晚十點半的tele-conference，正當大家在商討去邊度食飯的時候，有同事提議不如去食蛇，天氣涼涼地去食蛇都唔錯，近近地就選了這裡的蛇餐，我地只五個人，所以只叫得半圍。先來上湯焗生蝦伊麵底，雖然味道唔錯，但大家都唔敢食多，因為仲有九個菜在後頭；蛇肉兩吃是炒蛇絲同炸蛇丸，講真句食咁多蛇絲同蛇丸都唔覺有咩特別，蛇肉沒甚麼味道，估計蛇肉是用冰鮮大蛇，吃過一次用水蛇片係可以好鮮甜的，不過香港做到的沒有幾間，所以唔係呢度的問題；再來是蛇羹，足料而味道都唔錯，不過湯底是杰了些少，我還是喜歡蛇王芬的類型；雙冬扣羊一般水準，不過份量都幾足夠；菜膽雞同豉汁鱔都OK，但其實食到呢兩味大家已經七七八八；以饅頭及炒糯米飯作尾，能夠堅持吃到尾只有一位身材苗條的女同事，所以我話唔肥就點食都唔肥，要肥就唔食都肥，為咩要減？五個人食到飽到上心口，仲剩左成盒糯米飯同饅頭打包走。半圍蛇餐埋單連貼士七百幾，都唔算太貴，況且公司數，無所謂。