華順越南餐廳 (已結業)

7月10日, 嚟到北角就為咗食呢一間越南野~ 以為好難搵, 好彩一搵就搵到! 以為好up dup, 原來已經裝修過嚟, 好新淨好似新開咁~ 可能2點鐘, 間餐廳冇乜人…::: 生牛河 ::: $25牛肉仲係半生熟, 從來都唔會浸晒成塊牛肉落去, 咁先食到又有生, 又有熟嗰種質地~ 肉質唔錯wor, 仲幾有牛味, 熟咗嗰部份唔會太韌, 生嗰面都幾爽, 冇血淋淋嘅感覺~ 湯底亦好甜, 濃濃嘅牛湯味, 唔係加多大量香料不過已經好香~ 河粉呈現半透明狀, 咬落都幾彈牙, 又冇一舊舊咁~ 總括係中上水準~::: 豬頸肉撈檬 ::: $30賣相清新! 面頭大量嘅生菜絲同燒得金黃嘅豬頸肉十分討好!! d豬頸肉真係燒得外脆內嫩, 外層夠焦香, 內裡d肉仲係粉紅色架! 食落有少少香茅味, 襯托出鮮嫩豬味~ 正! d檬粉都夠爽口, 撈勻配料同檬汁一齊食好好味!::: 牛油雞翼 ::: $48有6隻, 算係中等size咁啦, 啱啱炸起, 熱到辣咀~ 雖然好香脆, 但係牛油味略為爭咗少少, 只有外皮食到d牛油味, 入面雞肉可以用淡嚟形容~ 反而最好食嘅係洋蔥絲, 牛油味道竟然比雞翼還要濃, 真係妹仔大過主人婆