名屋拉麵 (已結業)

荃灣區多嘢食就係人都知啦，然後今日我同朋友又發掘左一間新嘅拉麵店，呢間拉麵店嘅價錢仲要好合理，所以我哋二話不說就入咗去食！我就叫左一個碧綠翡翠拉麵，而朋友就叫左一個名屋豚肉拉麵，呢間麵館嘅好處係可以自選湯底嘅濃度，同埋麵條嘅硬度！我哋兩個都鍾意麵身比較硬有口感，另外我哋仲叫多咗兩個小食，分別係鐵板蒜蓉牛舌同埋日式煎餃子，正終於去到食既一刻，拉麵比我想像中大碗，不過肉嘅份量就唔算多！我叫嗰個碧綠翡翠拉麵上面仲有兩種顏色嘅魚子，帶子，流心蛋，木耳絲等等，都真係有幾多材料㗎！湯底方面我揀咗清淡，味道都真係幾清，所以比較建議大家選擇返正常嘅湯底！拉麵幾有口感，加埋其他配料食層次就更加豐富！而朋友嗰個名屋豚肉拉麵都相當唔錯，如果大家唔夠飽仲可以加面添，不過女士們就應該唔需要㗎啦！小食方面個鐵板蒜蓉牛舌非常吸引，蒜蓉味十足，而且唔會好硬，唔會咬唔到，好爽口！另外個日式煎餃子都相當唔錯，個外皮好脆，個餡唔會太咸，剛剛好！整體來講，咁嘅價錢有咁嘅質素拉麵，真係幾好！