今和壽司 (已結業)

收工同友人喺尖沙咀行街，醒起同事講過有間壽司店幾高質，橫掂喺附近就去試試先。餐廳除咗壽司外仲有刺身、定食同日式小食選擇，款式都幾多。我哋先點份海老忌廉薯餅，因為係即叫即炸，食落熱辣辣特別香脆。外層炸粉唔算好厚，中間嘅餡料好飽滿，食落味道好香，口感好滑，味道同喺日本食嘅一樣高質。壽司用一隻好長嘅直碟一字排開，夠曬排場，打卡一流。三文魚腩壽司嘅魚生好肥美，size仲長過舊壽司飯。甜蝦壽司一件有兩隻甜蝦，新鮮爽脆，味道好鮮甜。油甘魚壽司肉質好鮮嫩，口感柔軟細滑。劍魚腩壽司白裡透紅，食落油脂感比較重。北寄貝刺身擺盤有好特色，每一份有四片，肉質好爽脆味道好甜。三文魚牛油果卷灑上黑白芝麻食落好香口，牛油果食落好滑，健康又好味。