權發飯店 (已結業)

班朋友揀左年初三赤口團拜，屋主今年唔煮飯，我o地浩浩蕩蕩搭了幾個站叮叮落o黎食。筲箕灣個間幾年前試過，水準都好得。幸好我o地訂左位，8點半去到仍然有不少人在門口等，場面好虛冚。可能我o地晏左，羊腩煲、芥蘭菜芯豆苗、海鮮雜菜煲都沽清。一坐底我已立即點加大生炒骨，上台時我o地嫌不是加大，後來個待應好好幫我o地加多碟，即是前後兩碟中生炒骨。又係有水準的一間，甜酸味皆有，炸得夠脆但粉又唔厚，而配料的菠蘿比一般又大件。蒜香雞-皮脆肉滑，但欠缺雞味，幸好有蒜香味補救。海蔘花膠鵝掌翼-真材實料、用料十足，而D掌翼夠入味，唔會硬同韌。香酥荔芋鴨-要了全隻份量都幾大，新鮮熱辣炸起，外層酥皮夠香脆，我鍾意佢芋蓉較多鴨肉較少，不過真係一件起兩件止，因為都好溜。蝦仁炒蛋-好少見到用咁大隻蝦來炒蛋，蝦肉爽兼彈牙，而蛋炒得滑唔會老。蒜蓉炒西蘭花-雖然係一味好簡單的小菜，但佢用爆香左的蒜蓉去炒，所以特別有香蒜味。生炒糯米飯、琵琶豆腐、豆豉鯪魚油墨菜都唔錯。整體來講，每樣都好夠份量大大碟，而且又夠鑊氣。我o地12個人食左咁多樣野都係830蚊咋，真係抵到爛，好過自已係屋企煮。