至尊滿屋日本料理 (已結業)

今晚我們諗緊晚餐食咩嗰陣，行過旺角瓊華中心見到有多間食店，而我們就揀咗「至尊滿屋日本料理」，因我們之前喺他們嘅655分店食過覺得都幾好，所以就決定喺度食晚市放題！一開始我們叫咗個雜錦刺身拼盤嘅刺身都好新鮮，當中嘅深海大赤蝦刺身真係好鮮甜彈牙，而且都幾大隻，但令我們覺得有啲失望嘅係，出嘅份量就同我們入單嘅份量有啲出入！海膽手卷嘅海膽唔算太新鮮，而且有啲怪味！味付海帶枝豆，平日食開嘅枝豆都係原條上，但呢度係將枝豆拆出嚟一粒一粒咁，再同切成一格一格嘅海帶撈埋一齊食感覺相當爽口，而且好清新！芝麻鷄翼炸得好金黃香脆，肉質好嫩滑多汁！鹽燒海蝦嘅肉質相當爽甜彈牙！串燒鰻魚嘅肉質非常嫩滑彈牙，而且表面燒到有一層焦香，令到味道更加惹味香口！北海道海鮮鍋嘅湯底係奶白色，味道好清甜香濃！雪花牛肉鍋嘅牛肉喺上碟嗰陣仲係鮮紅色，用熱辣辣嘅湯底慢慢將牛肉浸熟，所以牛肉嘅肉質相當鮮嫩，唔會變到又「嚡」又韌，真係好正呀，但湯底嘅味道就略嫌甜咗啲啲！