放下素 (已結業)

素食自助餐喺香港唔常見，呢間自助餐模式由台灣引入，叫做放下素。餐廳希望大家食嘢嘅時候可以放低一啲無謂嘅執著，除咗支持環保同埋健康之外，呢度仲聘請咗唔少殘疾僱員，支持弱勢社群就業。第一次食素食自助餐估唔到菜式有濃有淡，幾多款式。最特別嘅係呢度嘅素食漢堡，可以夾塊漢堡扒之後自己烘麵包，diy一個漢堡。我怕太飽所以淨係食咗漢堡扒。雖然係用豆蓉製成，但一樣好入味。呢個西班牙薯蓉入面夾咗唔同蔬菜，好香好好食。仲有呢度即烘嘅果乾都好好食，特別係菇乾，有種自然嘅香甜。呢度嘅中菜款式都好多。炸物、小炒、甜品應有盡有。雲耳雞做到幾可亂真，素雞外脆，內層有咬口，比得上傳統齋舖。老火靚湯更加係好足料，飲落好清甜，仲有少少藥材味，值得一飲再飲。總括嚟講素食自助餐比一般嘅平，而且食飽飽都唔會太heavy，可以一試。