王將精點 (已結業)

今日又來到朋友屋企打機，打機之前當然要搵個地方填飽個肚先。朋友話附近有一間好好食的點心專門店，一於試下呢間「王將精點」。餐廳主打點心，仲有介紹點心二字的由來。可堂食可外賣，我地唔趕時間一於堂食。我地點了一個鳳爪排骨飯 $32，超大碟！排骨、鳳爪都好足料，加少少豉油食真係一流。我地仲點咗幾個點心，share食。蟹皇燒賣王 $28，有四粒，賣相十分精緻。沙嗲金錢肚 $28，有四件，金錢肚煮得超入味！索晒啲汁，好juicy。伴碟的蘿蔔夠淋，真係可以汁都撈埋。蟹子鮮蝦脆皮腸 $30，呢個有驚喜呀！蟹子多到滿瀉咁濟，咬落蝦球啖啖肉，外皮係好似炸兩的質感，咁香脆可口。真係好豐富的口感。奇趣炸蝦餃 $32，有三件。蝦肉足料，啖啖肉，而且新鮮即炸，熱辣辣。伴碟嘅係炸蒜頭，十分惹味！棒棒拉芝長春卷 兩件 $22。店員提醒，因為係即炸，咬落去時要小心，啲拉芝會漏出黎，小心燙口。堅正，估唔到傳統點心有呢個創新製法！配合芝士真係口感一流。朋友最後點了一杯草莓楊枝甘露 $25，粉紅色真係少女心大爆發，味道都幾好。當日都見到好多街坊外賣幫襯，選擇又多，係大件夾抵食嘅。