今次點嘅依然係尊貴海鮮套餐，海鮮連蔬菜籃有成十款咁多，非常豐富。點餐後侍應為我哋以蒸氣消毒餐具，並送上啱啱炸起嘅魚皮，邊食邊等。
第一款送上嘅海鮮係潮式凍蟹，冇過多嘅調味，食出最原始嘅鹹鮮，肉質亦相當結實。
越南虎蝦尺寸唔細，味道頗為鮮甜，口感爽彈。
元貝雖然唔大，但勝在味道鮮甜，蒸完嘅湯汁千祈唔好浪費，要將精華倒埋入粥底。
慶南蠔肥美飽滿，蠔味重而且一啲都唔腥；
刀貝尺寸中等，勝在清甜爽口。
九孔鮑魚大大隻，肉質厚實，入口彈牙；龍躉片夠鮮嫩，肉質爽滑帶少少膠質。
原隻澳洲龍蝦開邊非常有睇頭，而且肉質結實有咬口，入口啖啖肉令人非常滿足。
龍蝦頭仲有膏，色澤淺黃，香濃美味，非常邪惡。
全晚嘅戲肉當然係罕有嘅大黃奄蟹，平日食到嘅奄仔蟹通常都比較細隻，難得食到咁大隻，仲爆哂膏，實在令人喜出望外。
大黃奄蟹膏香肉甜，入口完全係鮮味爆發，加上肉質結實，相當有驚喜，係全晚嘅亮點。
作為全餐唯一嘅本地貨，有機蔬菜非常新鮮，食完咁多款海鮮當然要清一清味蕾。
最後食埋豬骨粥底，米花開得燦爛，好有潮州粥嘅感覺，加入菜脯令味道更鹹鮮。
雖然海鮮餐唔算平，但非常足料，大黃奄蟹更加係好有驚喜，海鮮亦處理得夠乾淨，整體對得住價錢，又一次證明老闆作為海鮮批發商絕對唔係浪得虛名。
