金鶴拉麵 (和富道) (已結業)

星期日下午黎到北角搵食，搵下搵下黎到和富街呢邊就見到金鶴拉麵開左新分店！雖然已經食過一次，但一直對佢地既雞白湯拉麵念念不忘，於是最後都係忍唔住入去坐低。同上次唔同既係，午餐可以加$28換一份小食，我同partner揀左炸雞三件。三件炸雞其實份量不少，每件都幾多肉，要讚讚肉質保持到嫩滑同多汁，另外碟邊有柚子鹽可以調味，建議食炸雞的話一定要點柚子鹽！微微酸甜可以帶起炸雞既味道，而且柚子鹽唔會太鹹的。重點當然係雞白湯拉麵，同樣暖暖既碗可以為拉麵保持熱度，雞白湯依舊濃郁，好似cream sauce的白色湯底雞味香濃，鹹度剛剛好會飲到少少胡椒香味。用低溫煮既雞肉同上一次有少少唔同，用既部份比較爽口亦比較大片，雞肉味都比較重。叉燒同樣保持到水準，薄薄兩片入口咬兩下就融化左。麵條方面，依然夠哂彈牙，韌度岩岩好。而最招牌既牛蒡絲今次略嫌有少少浸落湯既位太多，不過爽脆既部份都仲係好香同有少少甜味。整碗麵雖然望落份量唔算多，但所有野加埋的話其實會好飽，建議女仔可以響落單時講聲少麵，如果唔係有機會浪費架。