福彩海鮮酒家

营业中

休息中

工作實在太忙，放假都想靜下，但耐何阿媽唔知做咩好鍾意去飲茶，不過我真係唔係太鍾意飲茶，怕嘈怕等怕排隊，去親飲茶間唔中都搞到唔happy。論食物，福彩只算一般，普通港式飲茶格局，蝦餃燒賣牛肉腸粉之類，食品冇咩驚喜可言。你諗下，每到星期日爆到九彩好似唔憂做咁，老闆仲有咩意欲去提高食物質素？尤其是近年經濟好，服務更係差左好多，成間野鬼咁大，做死o的侍應阿哥阿姐，佢地仲邊有心情好好招呼o的客？呢排仲多左一宗罪，廚房出野愈來愈慢，甩單甩得到嚴重，叫六籠點心夠膽冇左三籠，等到冇心機再等敗興而歸。晚市亦唔見得好，客唔係真係好爆，但侍應都係打衝鋒咁，擺位果陣飛杯飛碟，有次同外地來既親戚食飯，嚇到佢地滴晒汗咁滯。其實中式酒樓係唔係一定要勁等位、勁嘈、一張檯搭三檯客、甩單漏野、飛杯飛碟咁？真係要去五星級酒店中菜部，先可以搵返o的「service」返黎？如果有飲食集團搞到o的價錢大眾化又有服務既酒樓，我覺得真係要比個諾貝爾獎佢。