今日放假，同朋友行街鬆一鬆，行到金馬倫道，發現黑木亭轉咗型做放題任食，之前食過食物新鮮好食，好，即刻試吓先！
上到餐廳，環境整齊乾淨，座位亦寬敞！價錢每人連服務費唔使$400。 除咗可以掃碼點食物，外面仲有沙律、炸物、椰子雞湯、桃膠奶，飲品有冷泡茶、啤酒、汽水果汁、熱茶、即磨咖啡、清酒、梅酒、紅酒、白酒⋯⋯任食任飲！
1
刺身一到，嘩！我眼球已經被松葉蟹腳同極品大赤蝦吸引住！大赤蝦真係對得住佢個名，好大隻，口感爽口又新鮮！松葉蟹腳蟹肉都十分鮮甜。其他食物都好好食，一邊食一邊同朋友講性價比高喎！
仲有呢個酒醉大頭蝦，用花雕酒調味，令蝦更鮮味，食落好甜，值得一讚！
A5宮崎和牛壽喜燒，味道唔會咸，菜嗦咗壽喜燒汁更入味，之後再食A5宮崎和牛真係入口即溶，喜出望外！我同朋友都encore咗幾次😋
日本直送鮮吞拿魚，美美雪花紋。
鮑魚蟹粥、燒菠蘿、蒜蓉蒸扇貝、櫻花蝦炸豆腐、經典蒜蓉蒸鮮蠔、蜜糖燒雞翼……全部都係我鍾意食嘅嘢！嘩，擺到成枱都係食物！好彩食物太好食，全部好快清光咗🤣
2
呢個A5宮崎和牛海膽牛角包，牛角包上塗咗啲沙律醬汁，食落酸酸甜甜，牛肉同海膽味道夾，仲加咗三文魚籽，豐富～
鮑汁花膠海參以為花膠得一塊，原來一碗都有兩大塊花膠，真係性價比高。薑蔥炒蠔雖然唔係大隻，但飽滿夠惹味 。
1
最後當然唔少得甜品啦！雪糕係Haagen Dazs😁！甜品櫃仲有好多甜品，仲有我最愛嘅抺茶卷。睇到選擇多到眼花撩亂，😂雖然肚飽到快爆炸，但甜品真係有第二個胃，所以又食咗幾轉😚
2
我哋被食物吸引到，不知不覺間，原來全場已經爆滿咗，出面仲有好多食客排隊等位。
我同朋友食到最後一刻🤣，店員有禮貌地話時間到了！
整體食物水準高、性價比高。雖然人多，但上菜快，兩小時都絕對可以密密食！
