金囍冰室

营业中

休息中

金囍冰室係一間令人感覺好悠閒嘅餐廳，入到去，待應唔會催你落單，你可以慢慢睇餐牌慢慢揀。而佢哋泡製食品亦唔會「趕頭趕命」，猴子今朝點咗一個熱狗做早餐，都等咗15分鐘先有得食。不過嚟得呢間餐廳嘅人都應該係「慢活一族」，佢哋唔介意等，事實上好多客人食完之後都喺度傾吓偈、玩吓手機。猴子今日食嘅係法蘭克福珍寶熱狗早餐。由於佢哋用嘅杯碟都幾別緻，所以一眼望落去都覺得幾靚，攞咗個印象分，雖然熱狗包同腸仔都同一般連鎖快餐店用嘅分別不大，但明顯地，個熱狗包係慢慢烘熱，唔會為咗趕時間而用高溫烘焗，避免咗烘燶麵包嘅情況，所以食起上嚟都幾鬆軟。腸仔亦係加熱得啱啱好，唔會烘到乾巴巴，保留返腸仔嘅嫩滑感。都係嗰句，幫襯一間餐廳有好多原因，呢間餐廳起碼可以令你暫時放空一吓。