好旺茶餐廳 (侯王道) (已結業)

同朋友試下撘去宋皇臺站行下，好少黎九龍城，唔知附近有咩睇呢。兜左個圈就搵個地方食下野，入左間叫好旺茶餐廳，見個店員好忙咁寫緊門口個餐牌，價錢好貼地一於試下啦。天氣咁熱，點兩杯冰飲下先，朋友叫左紅豆冰，自己點左杯雜果冰，嘩，真係好耐無飲過雜果冰啦，甜甜地幾正。點左個小菜套餐，有一個餸，送飯，例湯同一碟菜，仲包餐飲添，咁都係五十幾蚊抵到爛呀！叫左海南雞，雞件嫩滑，雞皮下無乜脂肪，食埋啲皮都無乜罪惡感，哈哈。仲有個好好味的海南雞醬，酸酸辣辣點雞真係好好味。蒜蓉菜心幾香口，條條菜軟㗎。另外仲叫左蒜蓉粉絲蒸蝦，賣相唔錯吖。啲蝦幾鮮甜，好香蒜蓉味呀，最正係啲粉絲吸左蝦味，加埋豉油熟油好正。叫海南雞可以揀油飯㗎，呢度個油飯唔油膩，似黃薑飯，仲有啲菜添，幾得意喎。個餐有例湯送，呢個好好飲，湯頭好濃好甜，是日係節瓜紅蘿蔔豬骨湯，飲完唔會口渴㗎，好好味想添飲，哈哈。店內幾闊落，光猛冷氣又足，幾好坐喎。小菜餐牌係門口外面，另外仲有張二人四人套餐餐牌，全部都係即日寫，睇下街市有咩賣就有咩好餸食。小菜都幾好味吖，支持小店。