新巴黎越南餐廳 (已結業)

Sogo 附近呢個位，老老豆豆，咁多年嚟都留低唔少腳毛，不過位於金百利廣場呢間越南餐廳，居然從來未幫襯過。第一次嚟，見到呢度地方大，乾淨企理，衛生程度好，未食先加分。叫個越式烤豬肉撈檬，成碗粉份量非常多，啲餸堆到滿滿😲。檬粉同酸蘿蔔絲等全部正常水準，至於個烤豬肉呢，應該係先用洋蔥同蒜片炮製過，好入味，都好惹味，不過略嫌麻油落重咗手，烤豬肉獨有嘅香氣唔太覺，反而較似用麻油同洋蔥爆得好香嘅炒豬肉條，都係好食嘅，不過就同最初嘅期望有少少落差啦。