店內以游水海鮮作招徠，需預先訂位，但舊舖環境仲地踎過熟食中心啲大排檔，一路食一路好多飛飛，相信新店衞生情況會有所改善。
⋄ 豉汁蒸蟶子皇
蟶子皇粗到手指公咁 🤯 豉香十足又唔死鹹，火候蒸得剛好超彈牙，最後留返啲蔥撈飯吸晒豉汁精華，Jap 爆！！！！好 L 正 😍
⋄ 椒鹽瀨尿蝦 每檯必點，手臂咁大隻嘅新鮮瀨尿蝦，有咩理由唔好食 ⁉️ 原隻拆出嚟鮮甜得嚟啖啖肉好爽，炸蒜鹹香惹味 🤤 不過價錢有啲肉赤，成 $300 一隻都幾奢侈，但嚟到又無理由唔食招牌，呢啲糾結位我明，我真係明 🤷🏽♀️
⋄ 鹽焗奄仔蟹 隻隻爆膏但焗得有啲過火，肉質偏乾，鹽焗嘅香料入到味 🦀 整體 not my style，下次都係食返肉蟹/ 膏蟹開心啲～
⋄ 椒鹽九肚魚
比平時食到嘅細件，九肚魚非常嫩滑，份量有點少
⋄ 黑椒牛仔骨煲
水分太多，牛仔骨無焦香感但都夠腍，黑椒味唔夠濃，爭少少鑊氣
⋄ 金銀蛋上湯豆苗 湯汁濃郁，豆苗嫩綠無渣，正常發揮啦
菜品水準不錯，點菜時建議問吓當日有咩靚嘢，揀返師傅拿手嘅菜式；海鮮高質但價錢偏高，時價記得問清楚價錢先落單，普遍定價係貴過西貢同布袋澳，三個女仔食咗成 $2700 都幾誇張，呢個價位大把選擇，咁嘅環境嚟講我哋覺得唔值，一大班人嚟可能會好啲（？）而且店內只收現金，食之前記得撳定錢 🤣
📍 𧝁師傅私房菜
大角咀中匯街 57-69號 中星樓 地下5號舖
1
