黑蒜 (建德工業大廈) (已結業)

今日要等師傅嚟做家居維修，唔得閒落街，有人好貼心，話一陣喺黃竹坑見完客，會買埋外賣返嚟陪我一齊食。原來預早喺外賣平台訂左呢間「黑蒜」嘅住家飯套餐，去到就有得攞，快捷又方便。餐廳主打有營便當，而午餐嘅設計更是別具心思。一打開個飯盒就會感受到店舖對健康的認真。每個飯盒除主菜外，還有雜穀米、有機蔬菜、漬物、自家製飯素，另外仲會附送住家湯或精選飲品，分量十足。黑蒜清湯牛肋條係餐廳嘅招牌菜，牛肋條大大件，肉質非常鬆化，炆得軟腍又夠入味，入口帶陣陣蒜香，味道很不錯。雜穀飯不只健康，還有美容瘦身的優點，況且面頭放左飯素，配上有機蔬菜，更加有「營」。配菜仲有大咖喱魚蛋同蕃茄，魚蛋彈牙爽口，醬汁辛辣刺激，食完夠晒飽肚。至於另一款瑞士汁雞髀，味道亦不俗，雞髀大大隻，外型完整，唔會甩頭甩骨，而且滷得非常入味，肉質好嫩滑，咬落無渣有肉汁。跟餐嘅西洋湯亦唔失禮，睇下幾足料，內有大量西洋菜，湯水清甜帶微甘，大人小朋友都十分適合飲用。