侍應嘅態度好好，好熱情，好有禮貌。姐姐好似氹緊小朋友咁樣
坐低先來咗功夫茶，清一清個味蕾先，
之後就落單點菜。
鵝腸，脂肪肥瘦適中，鹵得夠入味，但又唔會好咸，仲保留咗鵝腸嘅香味，底下嘅鹵豆腐夠嫩滑。
鵝片，馳名鹵水鵝，肥瘦適中，鵝肉入味，食得出肉質唔差。
荔芋香酥鵝，上層超級鬆脆，中間芋泥香濃，底下嘅鵝肉蓉，一面煎香，上中下層配合，口感好豐富。
潮式胡椒鹹菜浸台生蠔，估唔到份量咁多，台山號超級大隻，配埋胡椒鹹菜超級鮮甜，惹味。呢個真係值得食。
肚肉苦瓜煲，肚肉肥瘦適中，苦瓜處理得一D都唔苦，只有回甘，花菇都好厚身，吸埋個湯汁好鮮。
欖菜肉碎炒飯，個飯一上枱，就聞到好香嘅米飯香，令人垂涎，呢個飯真係炒得好出色，唔會太乾，同好有鑊氣。
清心丸綠豆湯，潮汕特色甜品，好鍾意佢唔係太甜。
飯後再嚟多一份功夫茶，清一清口腔嘅油脂，茶香回甘，順滑。
今日呢一餐真係食得舒服，位置坐得舒服，服務態度真係值得一讚。又係一個舒心嘅晚餐。
