十大碗粥麵專家

营业中

休息中

慕名已久嘅十大碗雲吞麵，成日喺網上關注組見到人分享食評，今日終於有時間去品嘗一下。原來除左最馳名既雲吞麵外，粥品同腸粉都極受歡迎，特別係炸兩腸。但係是日得一個人食唔到咁多，只好留待下次，今次先點一碗雲吞麵試試。如果有食過劉森記就會知酸蘿蔔係額外醃製送俾食客，呢間都唔例外，食落十分開胃，甜酸得宜，真係會食唔停口。卒之到主角上場，雲吞麵係正宗果種比較細碗，雲吞壓底，麵係上面，仲有畫龍點睛嘅蝦籽。麵條毫無梘水味，唔會太硬，配埋鮮甜嘅大地魚湯底非常匹配。雲吞有四粒，有散尾，食落蝦同肉嘅比例剛好，而咬落都有陣大地魚嘅味道，可能係加左魚鬆？唔講仲覺得呢間係歷史悠久嘅老店，幾樣技巧都掌握得相當好。