我哋兩個一坐低，先係望住個 menu 已經眼花撩亂，因為選擇太多，唔係淨係串燒牛雞豬咁簡單。頭炮我哋叫咗「燒芝士年糕」同「鹽燒萵筍」。芝士年糕完全冇失望，表面燒到焦香，拉絲又煙韌，芝士鹹香同年糕嘅嚼勁好夾，食落去有啲拉麵芝士波波嘅感覺。鹽燒萵筍清爽得嚟帶少少焦香味，用嚟中和芝士年糕嘅膩感啱啱好。
之後試咗幾款特別串燒，例如「蒜蓉菜圃燒豆皮」—呢個組合本身好少見，但燒到脆卜卜嘅豆皮內裡夾住鹹香嘅菜圃同蒜蓉真係幾惹味，朋友仲話呢碟好啱配啤酒。下一個印象深刻嘅係「蒜香牛油酒煮蜆」，牛油香混住蒜蓉味，蜆肉鮮甜冇沙，個湯底仲可以用嚟蘸麵包。至於「浜燒日本活北寄貝」就好鮮甜爽口，火候控制得好靚，輕輕咬一啖就知係新鮮。
而「紅蔥油蒜蓉粉絲燒元貝」係另一個亮點。元貝大大隻，粉絲吸晒湯汁，紅蔥油香味令成件事更突出。接住落嚟就進入重頭戲—肉類部分。「厚切鹽燒牛舌拖羅」同「鹽燒和牛牛小排」都係必食，牛舌切得厚，咬落彈牙；和牛牛小排油脂分佈均勻，入口即化。
雞類串燒好有驚喜。「汁燒三黃雞氣管」係少見嘅部位，咬落爽口得嚟帶少少焦香；「鹽燒鮮三黃雞腿肉」就多汁滑嫩；至於「汁燒免治雞肉軟骨棒」食落有咬口，再拌埋『月見』，好有日本居酒屋風格。另外仲有小小驚喜，好似「惹味爽口雞腎」同「鹽燒原雞皮」，雞腎爽脆，雞皮油香但唔膩，我地兩個人讚到不得了。
最後食埋「鹽燒白鱔」同「豬肋肉」收尾。白鱔肉質結實帶膠質，燒過之後更突出鮮味；豬肋肉係「稀有部位」，肉味濃厚得嚟唔會過肥，真係幾少喺香港 BBQ 店食到。配返一杯「咸檸七」，鹹香清潤，洗走啲油膩感，正到爆。
我哋食到成晚食到笑笑口。環境坐落舒服，氣氛好夠熱鬧，食物無論係海鮮定肉類都水準高，價錢以質素嚟講算唔錯。
