Thai-ger (已搬遷) 新店位置

上月某個週末晚上，忽然好想食泰菜，就記起之前朋友推介嘅一間小店，於是趁假期去試一試。小店地埋位置方便，去到荔枝角站d2出口搵到D2 place 入口，一上電梯左邊就係啦。入面座位唔多，大約只有20個。不過我地到達嘅時候只係晚上6時多，雖然係星期六，仍然有充足嘅坐位。研究完一輪餐牌，我地決定叫左個2人餐。見佢有湯，有前菜，有兩份主菜，同時亦有甜品及飲品，最驚喜係我可以選擇油飯。我地十分喜歡佢嘅冬蔭公湯 細細碗但都有唔少菇類，很有口感，味道亦足，頗辣。前菜則有幾款選擇，我地就揀左蝦餅同春卷，中規中矩。主菜方面，我地揀選左海南雞飯及黃咖哩豬頸肉飯，一碗白飯一碗油飯。海南雞嫩滑，入味，淡淡咸香一試難忘。而黃咖哩亦十分香濃，朋友讚不絕口，而我就略嫌偏甜，但配上白飯什至油飯都不錯。一頓完美嘅晚宴當然不能缺少蔬菜，小店嘅馬拉盞炒通菜十分惹味，亦極有鑊氣，絕對出色。最後還有甜品，是我最愛嘅椰汁西米糕，為成餐飯畫上完美句號，飲埋酸酸嘅檸檬茶，我又可以叫多一個2人餐啦，哈哈。