堂記腸粉專門店 (已結業)

尋晚放工同老婆去番左敦食飯, 試咗間叫"珠圓玉潤"嘅豬潤麵, 嘩! 好疏打粉味, 仲話”招牌”添, 老婆食咗三分二就放棄喇! 跟住見都已經七點鐘咪行過去”堂記”食番兩碟腸粉補番數囉! 計落喺左敦搬走咗都已經九年喇, 好懷念嗰時兩公婆喺”八文樓”租屋住嘅日子, 周圍都有好嘢食, 就算幾多點落街都唔會餓親, 超級方便! 講番”堂記”, 以前只係檔口鋪, 係冇位坐嘅, 要即食就好似喺日本咁"立食"(站立喺度食), 同埋佢係要到夜晚六七點先開檔, 我同老婆改佢花名做"夜之佬", 嗰時淨係賣腸粉,最正始終係蝦腸, 蝦夠爽腸粉夠滑, 不過宜家就縮咗水, 但都合理嘅, 另外試咗碟新口味(對我哋嚟講)燒鵝腸粉, 都唔錯, 至於粥就唔係佢強項, 普通水準啫, 所以就冇食粥喇! 同埋覺得佢賣粥只係等客人唔駛淨係坐喺度等碟腸粉咁耐冇咩細藝啫, 同埋老細自己都係堅持夜晚七點先番嚟拉腸粉, 早咗嚟嘅客人唯有食住粥等啦, 互相將就囉!