八幡屋日本料理 (已結業)

同閨蜜係朗豪坊大戰完一輪後，突然覺得個肚有點空虛既感覺，好想瘋狂咁食野，以補充岩岩大戰完所失去既能量。我記得之前係兆萬食過一間水準唔錯既放題，但一時又醒唔起叫咩名，所以同朋友一於去左兆萬先，反正個度又咁多野食。直到入左3樓電梯，見到張海報，我先記返起，八幡屋！所以就即刻同閨蜜上去再作戰。呢間放題食物既類型都好豐富，刺身、壽司、手卷、沙律、燒物、天婦羅等等都有。今次我地每人加多$50再食埋佢個「升級體驗」，升左級之後有得任叫帶子、生蠔、赤蝦刺身😍，仲有火炙和牛壽司，相當吸引！餐廳好細心，生蠔黎既時候已經幫我地剝左殻，而且仲加左醬汁，味道同生蠔好match，朋友話生蠔都好肥美！「升級體驗」既帶子同赤蝦。帶子好大粒，色澤雪白，味道鮮甜。赤蝦就好大隻，好新鮮，肉質爽口。兩個字，「抵食！」。另外一般刺身既份量都比得好足。三文魚大大塊，好肥美，螺肉都唔錯，甜得黎又好咬口。見到menu 有黑烏貝，但又唔知係咩，所以叫左兩片黎試下，試過之後覺得味道都唔錯，甜甜地好爽口。餐廳送既「五行」壽司！包括有火炙三文魚壽司、拖羅海膽壽司、火炙左口魚壽司、生蝦壽司、黑松露帶子配蕃茄壽司。賣相好高檔，味道亦相當唔錯。