豐盛嘅一餐由前菜開始－前菜都係師傅嘅家鄉小菜，又叫萬菜，食爐端燒時都會點幾碟邊食邊等師傅燒，所以多數都係冷盤嚟。印象深刻嘅有口感味道都好似cream cheese嘅芝士豆腐，又滑又開胃嘅蒟蒻，仲有第一次食嘅鬼爪螺！
蒲燒鰻魚係令我地最驚艷嘅燒物－鰻魚皮脆肉嫩，外層脆卜卜但同時亦能夠鎖住鰻魚本身嘅油香同鮮味，點啲鰻魚汁味道更濃厚。
燒蠔非常鮮甜，燒嘅時間掌握得好好，蠔肉唔乾身，食落依然鮮嫩多汁。
手羽先一夜干用到福崗嘅雞翼，特別大隻，風乾醃一晚所以好入味，雞皮燒至好靚嘅金黃色，唧少少檸檬汁味道更提升。
日本白粟米好清甜，燒過後特別香，好想食晒成條呢！
燒飯團有唔同口味揀，辛味噌夠惹味，芝士好香但較膩；飯團外面燒得焦香，好似有層香脆嘅外殼咁，入面嘅飯就軟綿黏口，配埋紫菜食口感豐富。
最後當然唔少得日式甜品－天神布甸係焦糖布甸嚟，淋上焦糖醬食到滿滿嘅幸福感，可以試試點海鹽變成海鹽焦糖依個微妙嘅組合；星野村布甸就係焙茶布甸，同紅豆蓉好夾，怕甜嘅都啱食。
