神燈海鮮酒家 (18廣場)

营业中

休息中

喺佐敦長樂街有間隱蔽嘅海鮮酒家，佢就係神燈海鮮酒家。佢哋嘅菜式好特別，有啲係喺其他地方未見過，亦好多人都推介，所以呢次專登嚟一試究竟。糯米炒膏蟹一個大鍋上檯，而且上檯嗰陣仲有嗞嗞聲，喺打開蓋啲飯香就湧入鼻腔，飯入面嘅鮮味喺飯香都感受到。膏蟹嘅份量好大，蟹肉夠哂鮮甜，當然佢啲膏就勁多，同糯米飯一齊食就更甘香。黑松露玻璃燒鵝呢隻燒鵝我第一次見，係一隻呈黑色嘅燒鵝，而喺香脆可口嘅鵝皮上面仲有陣陣嘅油光，可見燒鵝夠哂肥美，而佢黑色皆因係用黑松露，所以除咗燒鵝本身嘅油香之外，仲帶有陣陣黑松露獨特嘅香味，而味道又同燒鵝出奇地夾。伊比利亞叉燒皇用嚟自西班牙嘅伊比利亞豬所做嘅叉燒，肉質較其他嘅細嫩，仲有陣陣嘅果香，而配埋店家特製嘅叉燒醬，更能突出伊比利亞豬嘅優點。神燈小炒皇呢個小炒皇有別於平時食嗰啲，用料都有所不同，呢個小炒皇有豬板筋、油條、四季豆、馬蹄、腰果、蝦乾等。豬板筋同埋油條都有滿滿嘅油香，加埋新鮮爽脆嘅四季豆同馬蹄粒，仲有香脆嘅腰果同有咸鮮風味嘅生曬大蝦乾，令呢個小炒皇變得別具特色，口感味道都更有層次。