潮樓 (已結業)

見未夠鐘上機，又肚仔餓，所以便在這裡飲個早茶。一行四人叫了九款食品，有飯有點心，整體味道一般，價錢比出面分店貴少少，要求唔高，但求坐得舒服，填飽個肚嘅話，此店係唔錯嘅選擇。蝦餃同菜苗蝦餃外皮都算煙韌，菜苗爽脆，蝦肉彈牙，但鮮味一般。腸粉質感軟滑得來又夠煙韌，豉油又唔會過鹹，配腸粉同食，味道剛好。榨菜肉餅飯味道一般，肉餅調味太鹹，質感太粉冇肉味,飯又加水太多，又腍又爛。水晶包，有蓮蓉同奶皇味，外皮尚算煙韌，餡料味道同樣偏甜。時菜鯪魚球，質感唔彈牙，又粉又腍，調味偏鹹。粉果餡料花生太多，個人鍾愛沙葛多些，味道ok。糯米卷外皮太濕，有少少糊口，糯米尚算軟糯。菠蘿叉燒包，上枱時已凍，味道即時大打折扣，外皮唔脆口，餡料冇乜叉燒，汁太多，整體一般。