野見拉麵

营业中

休息中

呢排喺香港真係越嚟越多拉麵店，不過如果你問我有咩推介，太子野見既雞白湯拉麵我真係要講下。野見專做雞白湯拉麵，有3款揀，分別係雞白湯，雞鹽味，雞醬油，我第一次黎，揀左雞白湯，食完真係覺得唔講唔得。一坐低，侍應已經好快手送上拉麵，賣相好正，湯底奶白色，表面仲有一層泡沫，好吸引。聞落有淡淡雞香，未食已經流口水。雞白湯真係呢間店嘅靈魂，飲一啖湯，感覺到超濃郁雞味，但又唔會過鹹，完全唔油膩，飲得出用咗好多雞骨慢火熬製，啲湯好滑，入口好順。麵條方面，屬於偏硬身嗰種，掛湯力好高，每一啖都帶住湯底嘅精華，咬落仲有少少彈牙。配料都幾有誠意，有兩片雞叉燒，一片豬叉燒。半熟溏心蛋好正，蛋黃流心，味道帶少少鹹香，配埋湯底一齊食更加突出層次。仲有粟米筍同蔥花，清新得嚟又唔會搶味，做咗個好好嘅平衡。成碗拉麵食落去，唔會覺得膩。個人覺得呢間野見雞白湯拉麵CP值幾高，份量足，味道有層次。唯一小小建議就係如果多d湯就好，我加左個替玉，食完第一個麵d湯已經差唔多到底，仲要個碗係上闊下窄，最後要就住就住黎食。不過整體嚟講，真心推介畀鍾意雞白湯拉麵嘅朋友，下次想食拉麵記得去試下！