大滿喜日本料理 (已結業)

食物種類非常多，由刺身到熟食都包羅萬有，而且環境好企理乾淨，每枱都有卡位，傾計可以暢所欲言。自助區有小食同飲品，揀左枝2%桃水，唔太甜，推介。首先叫左啲串燒，當中燒鰻魚最出色，質地柔軟，沾滿燒汁，encore左2次。燒雞軟骨都好惹味好爽脆。燒翠玉瓜就有少少辣，應該加左黑椒，但好多汁同香口。至於每次必食嘅牛舌，無驚無喜，正常地好味。壽司叫左啲炸蝦卷，小小一舊可以一啖食哂。當中最好食係炙燒左口魚壽司，入口油香滿滿，好新鮮，可以食多次。友人病重只可食粥，仲有牛乳菜鍋，病人最啱食。刺身叫左三文魚，油甘魚，帶子，虎蝦等，唔算肥厚但都好新鮮，少少份量唔會食滯！另外仲試左羊架，好大隻但肉質好鮮嫩，而且唔會太咸，整體都唔錯。