黑門水產すいさん (棉登徑)

太耐冇食過日本野，去左尖沙咀食磯燒同埋刺身，店鋪裝修真係好貼近日本磯燒店。黑門蟹味噌甲羅燒($72)，食磯燒我必定叫甲羅燒，因為真係好鐘意食蟹膏，膏味都好濃郁，而且仲配一塊餅乾，食起上黎唔會過鹹太膩，亦都有辣味炸乾蒜，幾創新既食法。磯燒大虎海老一本($78)，虎蝦夠新鮮，生既時候蝦身呈半透明有光澤，熟左好厚肉，而且落左少少黑胡椒更加好味。海膽燒帆立貝($85)，帆立貝大粒飽滿，燒熟左會出大量水，當成一個湯汁，簡直原汁原味，海膽熟左口感亦都較為結實，兩者配搭上幾夾。黑門三文魚加州反卷($98)，加州反卷製作同其他日式店差不多，但哩到餡料加入左牛油果，軟軟林林既口感都不錯。深海池魚刺身4切($138)，池魚口感豐富，近魚皮位置既肉會結實一d，另一邊就較軟林，賣相亦相當肥美，每片差唔多要$35蚊，可能哩個就係矜貴之處。活赤貝刺身($88)，唔需要點醬油，就咁食就最正，索索聲既口感，非常爽口。食左六道菜，賣單6百蚊左右，價錢適中。