富臨皇宮

营业中

休息中

久唔久去吓其他地方嘆吓茶，求其一間撞下，望吓個價錢都好平民，而且又唔使等位，就入去試吓係咪咁平靚正。一入去見到個大廳，一望無際中間冇柱位，如果好似以前咁樣擺酒結婚就唔錯，不過而家就冇乜作為。原來佢有個地方專係飲靚茶，就貴少少試吓你，不過都係果句，茶樓真係無靚嘅普洱，墨汁咁嘅色又無茶味，睇怕今次又中伏。 今日冇食到四選一，只係食其他點心，因為多數呢啲特價嘢，都係細細件冇乜肉食。叫下啲最基本嘅，試吓佢有冇料到。先講包類，以馬拉糕同叉燒包為例，個包瞓得好鬆軟，有香嘅包味。叉燒包啲餡就似一般叉燒料冇乜特別。再講經典嘅燒賣，都係大集團熟口熟面嘅味道，冇乜驚喜。牛肉球依然溝唔同嘅料入去，既冇牛肉味，更加冇陳皮味。反而有兩樣點心值得點提，特色炸兩同埋個煎堆仔，炸兩唔係用一般嘅油炸鬼，依家用咗類似越式春卷皮，識落冇咁油膩而且比較爽脆，如果中間飽啲芒果配上沙律更加有特色。而煎堆仔發起好大個，皮薄鬆脆有少許油香味，係有少少出乎意料。咁嘅價錢已經比好多，屋邨酒樓好得多。以往去過呢一間其他地方嘅分店都冇乜好感，不過呢一間可以令我改觀。