【冬蔭功蝦湯】
呢個冬蔭功算係偏向少辣，比平時飲嘅更鮮甜，佢啲配料好足，隻蝦好大隻。
【泰酸辣生蝦】
生蝦新鮮爽口，配埋青檸薄荷汁，好清新！
【大尾魷】
大尾魷我揀咗黃金炒，即係鹹蛋黃，佢哋仲會落埋鹹蛋白粒落去炒，幾Juicy唔會炒到太乾身，魷魚冇雪味，呢碟菜偏濃味但食得出冇乜味精。
【蝦頭油大蝦炒飯】
蝦仁好大粒，飯好香嘅蝦醬味。見到隔離枱食菠蘿炒飯都好吸引，但朋友唔食菠蘿，下次試！
【炭烤串燒】
串燒係炭火烤嘅，啲肉全部都冇雪味，肉質鮮嫩唔會嚡熠熠，亦唔會燒到好乾。我最鍾意係個泰地道豬肉，豬味濃但唔羶，泰國圓茄子串燒唔係間間有，好好食！
【黃咖哩炒大虎蝦】
黃咖喱都係偏向少辣，係偏甜嘅咖喱，怕辣嘅朋友都可以食到。足足有成4隻大蝦，蝦肉彈牙冇雪味，撈埋個咖喱好惹味，殼都舔乾舔淨，哈哈！
【芒果糯米飯】
店員推介我哋食呢個芒果糯米飯，原來因為甜品成日轉所以喺Menu冇寫嘅。店員話係師傅親手新鮮整，並唔係好似有啲店咁現成入貨返嚟。上到枱時仲係暖嘅，感覺好似以前喺泰國食咁，而係香港食就多數係室溫居多。糯米飯飯鬆軟唔軟，椰汁味好香，芒果甜又冇渣，好抵食！
呢間泰國菜食材新鮮，就連啲配料都做得好好，價錢真係實惠分量又足！我喺呢頭返工所以實會再Encore！
