Burgeroom (Fashion Walk)

营业中

休息中

今日食完lady m滿足咗個甜胃之後竟然想食啲鹹食，於是就去咗佢斜對面嘅Burgeroom食burger ；餐廳環境簡潔，牆身係淺灰色嘅水泥牆，餐枱同櫈係有黑色金屬邊框嘅木枱櫈，一整個感覺帶點工業風；可以揀室內或者室外嘅座位，照顧到同行食煙嘅朋友。特別鍾意佢啲茄汁任唧，對上一次見到呢副架撐都要數到二十年前嘅Wendy’s同Jack in the box，又或者係去外國旅行嗰陣喇。黑松露芝士薯條，炸得香脆嘅薯條被黑松露芝士汁緊緊籠罩，本身都經已非常好味，若然再點一點後面嗰個酸辣醬汁，風味更佳。單骨雞翼配蜜糖芥末醬，廚師細心將雞翼拆成單骨，食得好方便，呢度個雞翼嘅脆漿比起其他地方嘅特別酥脆，簡直有如荔芋鴨咁酥脆，芥辣醬經過調味，入口甜甜地，啱哂唔鍾意傳統芥辣嗆鼻攻喉嘅朋友。墨西哥辣椒芝士牛肉漢堡，牛肉漢堡目測有成五寸咁厚，而淨係塊牛肉都有兩吋，溶化咗嘅芝士攤軟喺塊牛肉上面，十分juicy，加埋墨西哥辣椒微微嘅辣味，一整個就係十分之夾。