黑木亭居酒屋 (金馬倫道)

黑木亭居酒屋最近喺尖沙咀开咗新分店，最适合我呢啲九龙人。餐厅内装潢充满日式风味，听讲迟啲仲会加入新干线送餐，睇嚟佢想走埋亲子餐厅嘅路线。餐具采用一系列嘅樱花设计，女士们就最欣赏。三点刺身盛分别有三文鱼、剑鱼腩同油甘鱼，刺身嘅质素非常高质，而且厚切鱼生令口感更丰富更滋味。鲜虾青苹果沙律入面除咗有鲜虾、苹果、沙律菜之外，仲特别加入咗牛油果，而且仲有大量蟹籽，味道非常清新。卷物我哋就拣咗鹅肝青瓜带子海胆卷，呢个配搭比较新颖，其他餐厅都比较少有，而且仲有我最钟意嘅带子同海胆做食材，同时间有两种享受！矶煮鲍鱼酱汁已经渗透入鲍鱼内，切成薄片，卖相精致。吉列海鲜炸串分别有鱼柳、生蚝、带子、虾、鱿鱼，食材用料上乘，而且炸得好干身，食起上嚟唔觉油腻，如果钟意食炸物嘅朋友应该可以自己食哂一整份！烧物方面，我哋分别拣咗汁烧牛肋串($42)、麻辣黑豚荔枝卷($38)同法式羊仔架($52)，调味选择其实可以自己自由配搭，我尤其钟意黑豚荔枝卷，既清新又清甜。