焰拉麵 (已結業)

呢間拉麵店喺元朗都開左一段時間，隔左一排無食佢喇。本身想行去食鹵家，未到7點已經見到一條長長嘅人龍，唯有放棄啦！既然都行左過嚟呢度附近，於是走左過去食焰拉麵。自從元朗開多左幾間拉麵舖頭之後，我已經好耐無食過呢間喇。佢都係未到7點入面都差唔多full。今日呢頭有幾間食店都無開，唔知有冇關係呢！叫左一個鮮焰，一個山松焰同埋一個七味雞翼，另外加左一個拉麵combo。拉麵combo包左隻蛋、沙律同埋一杯飲品。七味雞翼有d七味粉嘅味，正正常常啦，$18有3隻，算係咁啦。山松焰上面有d黑松露放左喺拉麵上面，肉我就揀左雞叉燒。雞叉燒應該係雞扒肉捲成圓條狀再切片 食落又幾有新鮮感，而且感覺上無叉燒咁肥膩。麵質軟硬度可以自己揀，唔會煮到好淋有d咬口。另外一個係鮮焰拉麵，好明顯呢一個係正常拉麵嘅配套，有叉燒有紫菜，有d木耳，最特別係佢加左d櫻花蝦。個人比較鍾意鮮焰嘅湯底，山松焰嘅湯底被黑松露嘅味道蓋過晒d味道。食完見到枱面仲有其他湯底嘅拉麵，一定要搵日再試試先得！