影片
更多
2012-04-30
1848 浏览
對我o黎講, 「農場餐廳」呢四個字係似遠還近o既記憶, 依然印象深刻. 最記得o既, 並非港九新界都有o既分店, 亦唔係佢o個o的茶餐廳級數o既西餐, 而係餐牌裡面o個o的農莊動物o既可愛繪圖 - 牛牛、豬豬、小雞、小鴨 - 比麥兜同佢o的friend更親切. 正因為呢份情懷, 當佢地係多年前全線結業時, 我感到突然同唏噓; 可幸o既係, 「農場」o既老闆經歷過咁o既風浪, 依然可以東山再起, 以「農家意粉」o既名義, o係上水石湖墟以茶餐廳式o既舖位重建自己o既事業. 自己安心之餘, 亦想知道「農家」o既食品質素, 會唔會比以前o既「農場」有所進步. 所以我就趁早排復活節假期o個段時間, 走o左去試佢地o既意粉餐, 為求確定再生o既「農場」, 能唔能夠為食客帶o黎驚喜.(註: 呢篇食評包含o左今年4月9日中午同4月12日晚, 合共兩次o既試菜)呢度位於 “石湖墟市政大廈” 2樓o既熟食中心內 (見上圖), 有6、7張接檯大約可以容納20-25人左右. 由於要同其他食肆舖位共同分享用膳o既空間, 所以佢係屋村東菇亭o既大排檔氣氛. 呢個唔係問題, 最重要o既係食物. 佢地o既午餐同晚餐
(註: 呢篇食評包含o左今年4月9日中午同4月12日晚, 合共兩次o既試菜)
呢度位於 “石湖墟市政大廈” 2樓o既熟食中心內 (見上圖), 有6、7張接檯大約可以容納20-25人左右. 由於要同其他食肆舖位共同分享用膳o既空間, 所以佢係屋村東菇亭o既大排檔氣氛. 呢個唔係問題, 最重要o既係食物. 佢地o既午餐同晚餐主要係以各式扒類配搭意粉或飯o既套餐. o係呢兩次試菜裡面, 我先後點o左:- “燒羊架 + 黑牛肝菌汁” + 意粉 + 羅宋湯 + 熱奶茶 (HK$46); 及
- “安格斯西冷牛扒 + 黑椒汁” + 意粉 + 忌廉雞湯 + 熱奶茶 (HK$74).
味道係點? 唔講咁多, 立即去片:
羅宋湯 (見上圖): 好足料, 椰菜、芹菜、紅蘿蔔、蕃茄、牛肉樣樣齊, 煮得入味, 完全合格. 10 分為滿分, 佢有8分.
忌廉雞湯 (見上圖): 並非一般o既 “白湯”, 有粟米粒, 口感較薄, 似食緊雞蓉粟米羹, 係我意料之外. 相當唔錯. 8分.
蒜蓉包 (見上圖): 細細一片用奶茶杯載住, 好的式. 麵包係法包, 烘夠無話乾憎憎, 可惜嗏上去o既蒜蓉牛油份量好少, 感受唔到牛油配包o既味道. 兩次試食都有同樣o既情況. 4分.
燒羊架意粉 + 黑牛肝菌汁 (見上圖): 羊架係6 - 8安士有四支骨. 單單睇o的骨佢應該係well-done, 要撥開o的牛肝菌汁至可以睇同試清楚. 切開o左既羊扒 (見下圖):
有一邊燒得唔係太熟, 除此之外, 佢冇明顯o既騷味, 肥瘦均勻, 有羊扒厚實o既質感, 唔錯; 如果能夠再燒熟一o的會更好. 7分.
黑牛肝菌汁 + 意粉 (見上圖): 意粉屬於幼身, 只係少少過o左al dente又未至於淋啤啤o既程度; 牛肝菌汁o既牛油味甚重, 片片牛肝菌充滿於汁內, 配意粉食效果甚佳. 7分.
安格斯西冷牛扒意粉 + 黑椒汁 (見上圖): 西冷係6 - 8安士. 上檯所見應該都有6 安士左右. 切開o黎睇 (見下圖):
牛扒都幾厚身, 斤兩十足. 燒起時大約係7成熟, 屬於o岩o岩好o既生熟程度. 再食多幾舊, 開始食到o的牛肉起渣o既感覺, 表示呢件西冷愈食愈似樣. 食到最尾近著筋同脂肪o既部分可以話係成件西冷o既精華, 每一啖都有肉有筋又有膏, 係感受最好o既一刻. 呢個西冷令我對以往「農場」平庸o既食品質素有所改觀 , 係有水準之作. 8.5分
黑椒汁 + 意粉 (見上圖): 意粉o既質素水準都同上次一樣, 少少過o左al dente, 黑椒汁汁濃味足, 配意粉o既效果同樣不錯. 7分.
熱奶茶 (見上圖): 上檯時夠熱, 茶同奶味都夠, 飲咁耐亦唔見茶面起膜, 交足功課. 7分.
最後不可不提o既係呢杯侍客用o既水 (見上圖): 我初時以為佢只係一杯普通o既白開水, 飲落發覺佢滲著一絲絲o既檸檬味, 原來每一個裝著滾水o既水壺內, 都有一個切開o左o既檸檬, 使檸檬o既汁同味都能滲入水中. 呢點點心思同心意, 我完全接受! 9分.總結: 作為重生後o既「農場」, 呢度o既食品大致上已經超越以往「農場」時代平凡o既水準. 我一定會再返o黎幫襯. 老闆東山再起o既雄心, 可以從每樣食物每個細節之中睇到同感受到. 只要佢地能夠保持住水準並繼續改善, 相信「農場」回歸港九市區亦為時不遠矣. 到時, 就讓我再次見到餐牌上o個o的可愛o既牛牛同豬豬插畫吧!
张贴
