龍味館

呢間嘢同隔離飲茶應該係同一間公司，見佢啲員工兩間穿插咁樣行嚟行去。好處係佢個餐牌度有隔離鋪某幾款點心可以叫嚟食，有陣時夜晚無得飲茶但又想食點心啱晒。

散叫冇套餐咁抵，所以叫咗個二人餐。見佢上菜個份量覺得性價比幾高，比想像中大份。

老實樣樣都幾好味，啲調味OK同埋最緊要上枱夠熱。
個燉湯真係幾入味，唔係水寥寥嗰隻。
最衰叉燒係頭盤嘅拼盤其中一格，如果可以單獨一個叉燒做頭盤就正啦，而家略嫌唔夠喉。

招呼正常唔錯，裝修行暗黑調風格，坐就正正常常。

個套餐最吸引係個點心拼盤，可能因為我想夜媽媽食點心，有四款點心，單叫都幾貴，跟餐嗌就抵啲啦！