星橋居酒屋

营业中

休息中

跟朋友嚟到蘭桂坊附近，原來蘭芳園再行上去有間居酒屋，有發現到城市驚喜嘅感覺。汁燒蔥牛肉卷燒得好香口，爆汁嘅蔥令到成個組合更加juicy，幻想到如果做lunch set嘅話會係好好餸飯嘅菜式。牛舌芯同牛肋肉都係必叫，厚切有肉汁，燒得啱啱好，簡單加少少檸檬汁，牛味已經好突出。油揚令我有驚為天人嘅感覺，豆腐好嫩滑多汁，似平時滷豆腐嘅質地，表面嘅豆皮完全索滿晒醬汁，一咬落去就咇晒出嚟，忍唔住即時encore。秋葵同銀杏都好新鮮，銀杏煙煙韌韌，平時少食，我哋試完都好鍾意。唐揚雞軟骨有生炸嘅風味，唔會好厚皮，雞軟骨夠大塊有咬口，仲連咗少少雞肉，食得出係靚料。明太子芝士醬薯條十級推薦，個醬超級香，完全係明太子pizza味薯片嘅味道，鹹香惹味，薯條熱辣辣夠晒脆，係好有薯味嘅幼薯條。牛油果炸蝦卷淨係睇個組合已經知唔會輸，牛油果香濃軟滑，炸蝦酥脆乾爽，口感豐富。