Green Orange

上環有好多隱世美食，位於上環永樂街就有一間。 Green Orange 鄰近上環地鐵站，由地鐵站步行幾分鐘就到，位置非常方便。餐廳裝修以歐陸風格，配合柔和嘅燈光非常有情調。餐廳食物款式選擇多，而且有啲仲好特別。當然有女士最喜歡嘅甜品啦。點餐之後店員即時送上餐包，餐包外脆內軟，加上黑醋同橄欖油一齊食味道一流。香煎鵝肝伴砵酒燴梨，煎香嘅鵝肝配上一片多士，中和咗鵝肝嘅油份，砵酒燴梨非常入味。燒帶子柚子沙律，有四隻好大隻嘅帶子，帶子新鮮而且爽口彈牙，加上柚子酸酸地非常開胃。腐乳忌廉汁羊肉扁意大利麵，非常特別嘅配搭，西式嘅餅意大利粉配合中式嘅腐乳，味道竟然出奇地夾，腐乳忌廉汁加上肉嫩多汁嘅羊肉味道配合得天衣無縫。海鮮慕斯烤釀大虎蝦，有三隻大虎蝦，蝦肉結實而且新鮮，海鮮慕斯提升虎蝦鮮味，而且仲有大量配菜。檸檬芝士蛋糕，芝士蛋糕軟身有好清新嘅檸檬味，而且唔會太甜。椰子雪葩，食起嚟有好重嘅椰子香味，而且賣相吸引。總括餐廳店員服務態度一流，食物亦好有質素，而且價錢合理。