喜多嬉牡蠣屋 (已結業)

📍中環人氣嘅日本北木島直送生蠔熟蠔放題！$598就可以任食2小時，除咗兩款蠔，帆立貝同串燒都係任食！未食蠔之前，餐廳會安排海鮮湯同埋味淋魚乾先，海鮮湯好足料，入邊有蝦、蜆肉同帶子，店員仲會夾晒出嚟俾我哋食。之後會有懷石八品作前菜，當中包括松葉蟹肉凍、和牛沙律、吞拿魚蓉、活燒鰻魚等等，當食完之後店員就會準備上蠔！生蠔size唔算好大，但係每一隻蠔肉都好飽滿得嚟又鮮甜！而焗蠔同帆立貝可以揀原味、蒜蓉、辣蒜蓉同芝士味，呢個我哋就覺得焗帆立貝再出色啲，會更加juicy同埋彈牙。另外串燒都係任食，選擇都多，咁多款嚟講燒蔬菜最有驚喜，都燒得好多汁同又入味。最後半個鐘，店員仲會上埋松葉蟹烏冬同埋甜品(今日係鯛魚燒配蕨餅曲奇雪糕)作結，呢個餐份量真係超多，係中環區入邊放題高質之選。