白鬍子炸魚薯條 (已結業)

去開中環碼頭搭船，又見餓餓地，見到呢間炸魚薯條好多人排隊，一於試吓佢，價錢都唔算太貴。招牌炸魚薯條＄68件炸魚都幾大，色澤均勻，每盒炸魚都可以選擇一個醬汁，我哋就揀咗蜜糖芥茉醬。感覺係比較安全嘅一個味道，薯條都可以點蜜糖芥末醬，份量好夠同埋個味唔錯！炸魚啲皮同埋啲肉有少少分開，但係啲肉又唔會太散或者爛，質感唔錯，冇骨又香滑。薯條亦很大，裏面有好多薯蓉，所以唔係好脆但係夠豐富，食完一定好飽。煙肉芝士薯條＄35啲煙肉切左一粒粒，而且有少少脆身。芝士味都好香，滲透晒喺薯條嘅表面，不過食之前一定要攪拌，如果唔係嘅話只有上面味道好濃郁但係下面好似普通稔咗嘅薯條。鮮榨檸檬汁＄22檸檬蜂蜜＄22一人叫咗一個檸檬飲品，睇吓有咩分別，同埋搭船冇嘢飲真係成粒鐘好無聊。鮮榨檸檬汁係偏酸，不過因為水嘅份量比較多，所以好容易入口而且清新。檸檬蜂蜜就有少少似平時飲嘅熱檸蜜，甜味比較低但係就比較重蜜糖味。下次經過嘅話不妨試吓！