一寿司 (已結業)

也是「久迎大名」，前日終於一試。晚上照舊等位等到人都顛，等了個多小時。老實說個人對於環境要求一般，倒是食物方面馬虎不得。本來見店外人龍對此店略有期望，怎料人算不如天算。本人偏向選擇較「傳統」或「大路」的款式，一來個人喜好，二來方便比較。以前通常去開峰壽司及板前，以此店相似的價錢對此質素，坦白講，令人失望。首先三文魚子軍艦，三文魚子量少得舖在下面的白飯清晰可見，如此孤寒製作，印象分已麻麻；海膽軍艦味道與前述二店亦差天共地，食不出鮮味；大甘蝦不算差但亦無新鮮感；專登試好多香港人例牌的三文魚，與其講味道，應該講「冇乜味道」。一言蔽之，唔夠新鮮，而且此「唔夠新鮮」還要在晚市大排長龍不愁去貨之時發生，加上SIZE已經明顯比其他店為細，軍艦竟然還「減料」，實在令人難以開開心心俾錢。食完後步出店外看見仍有不少人等候，不明所以，但想起連元綠都有人排隊，只道各人有各人喜好吧。至於我，反正都是排隊，我寧願去返板前排（同一價錢級數的話個人最愛是峰壽司，可惜不就腳），起碼我俾錢時唔會頂住頂住。當然啦，此店比元綠還是不能一概而論，但同元綠比，是否好可悲？