天樂餐廳 (已結業)

昨晚的食家聚會吃的太多，飽到今朝仲飽緊，感覺上是連那幾隻餃也未落格，更遑論那個結實的叉子燒餅！自己雖然飽但亦要照顧肚餓的太座，所以不吃午餐，就到三點幾才與她來這裡醫肚。呢度有多款下午茶餐，價錢都是三十蚊樓下，看樣子幾抵食，難怪咁多人，全程坐滿亦不停的有人在等位。叫了燒肋骨沙律同瑞士汁炒河，另外亦叫了炸雪糕。雖說是廿幾蚊的茶餐，但份量都不算小。我的沙律一般，個燒肋骨就幾好味，不過就有點油膩；說起油膩就不能不提老婆的那碟瑞士汁炒河，單看樣子已非常之好油水，吃了一口味道是不俗，瑞士汁是夠色水又夠味，如果不介意太油的話是不錯，碟頭都不小，夠飽；上炸雪糕前侍應會問一問客人，夠体貼。炸雪糕幾大個，有一個網球咁大，伴以朱古力醬，賣相都不俗。裡面的是士多啤梨雪糕，可惜因為個体積太大而入面的雪糕幾硬，外皮不算薄，幾腍，口感一般，不過這個下午茶餐的炸雪糕只賣23蚊，都不能苛求太多了。埋單連貼士八十蚊，侍應已醒目的預先把零錢拿來，縮短了埋單等的時間，方便佢地亦方便客人。價錢平食物不太差，值得一試。不過檯set得密亦幾嘈雜，來傾計就不太適合。