1
餐牌有小菜，燒味，湯羹魚翅，海鮮，都有套餐。
老爺子半肥不瘦蜜餞叉燒 例 $128
先黎一客燒味。叉燒一客9件，隻碟係暖既。叉燒半肥瘦，外皮少脆而入面非常腍，個汁都好啱味，蜜汁調得好。呢個份量都唔少。正野！
龍蝦湯瑤柱燴海皇羮
龍蝦湯瑤柱燴海皇羮用左兩隻好靚嘅湯碗裝。材料好多吓，有爽脆蝦肉，瑤柱，菇菌，紅蘿蔔，豆角，蛋白等等。味道好清，不過我都冇另外加調味，都幾健康。如果龍蝦湯味道濃d就更好。
燒汁煎焗海石斑頭腩煲 $168
燒汁煎焗海石斑頭腩煲原煲上，吱吱聲熱辣辣上枱。石斑頭腩有10舊左右，雖然有骨，不過好入味，外脆內淋，明顯煎過。其他配料有燈籠椒，蒜頭同洋蔥，非常入味。
蜜椒薯角一口牛 $118
牛柳粒好淋，牛味又濃，份量唔少。薯仔外皮少脆而內軟。其他配料有燈籠椒同洋蔥，最後灑上白芝麻粒。呢道菜都好好。
蝦乾啫啫通菜煲 例 $98
蝦乾啫啫通菜煲都係原煲上，吱吱聲熱辣辣。通菜好嫩，吸咗好多油，配有蝦乾同肉碎，一d都唔寡。
陳皮綠豆沙
食完仲有糖水送，係陳皮綠豆沙，綠豆煲到爛哂，陳皮味好香，完全唔甜。
今餐菜式豐富又惹味，一如以往，水準不俗。餐廳係自家製品牌，師傅曾經喺日本東京富麗華工作，專為高管達人同明星服務，返港後喺多間米芝蓮酒店同大型連鎖集團做主管，來頭都唔少野。聽聞呢度所有手作點心係現場即點即做。
