火間土 (已結業)

友人生日，指定想去火間土慶祝，兩星期前訂定搭搭米的檯，仲要限定係食兩個鐘好埋單走人、另收$50蚊切餅費，心想真係把閉﹗但為了食好野都係值既﹗十分期待。當晚準時6時30分攞檯，座位同環境唔見舒適，侍應生服務態度已不殷勤，算﹗斟茶遞水自己服侍自己。我地嗌左芝士蟹肉炒飯、鰻魚窩飯、日式薄餅、燒物、魚生飯、沙律、炸蝦卷，除了芝士蟹肉炒飯有些特色外，其餘的菜式均是一般水準，唔明點解會咁出名、價錢亦唔平，唔算公道，食物質素超一般，又係另一間靠名氣上位的餐廳。中場時已兩度提醒我地準時交檯，很煩﹗最離譜係幫我地攞蛋糕出黎切時，整到我地個cake好似打風咁，走晒樣，好明顯係比人用力"choke"過，令佢傾斜一邊﹗個侍應拎黎時勁強調﹕唔關我地事，一打開已經係咁，唔關我地事﹗我地之後叫佢經理黎，仲衰，身為一間所謂走高檔路線既餐廳經理，點都要以客為先，起碼的禮貌都欠奉，講﹕「如果係我地整既，我地會道歉，但我地一打開已經係咁，咁今次我地唔收你$50手續費啦，但唔關我地事」咁既customer service，點叫d客滿意，我地唔係黎乞你既，黎買你d食物同服務架﹗我真係好訝異佢既態度同答覆，佢好明顯生意大把唔憂做