一目日本料理 (已結業)

今日嚟到呢個屯門民生屋村嘅小型食街，眼見都超過20間不同嘅食肆，見個這間餐廳名幾特別而價錢亦合適，今晚決定喺呢度開餐。點我最鍾意食嘅吉列炸蠔，$48/5隻，價格吸引，炸嘅火喉同時間都控制得好，外皮炸脆卜卜，仍然鎖到入面的蠔汁，其中一隻，我咬落去嘅時候啲蠔汁彈到我個面。海膽蟹膏炒飯有大約半板海膽，海膽好新鮮，炒飯炒得好乾身。食日本料理，刺身就會睇到師傅嘅工藝，所以點左一個四點刺（即是有四款刺身），件件都好大件，食得出好新鮮，我最鍾意油甘魚同甜蝦。