尚上下夏 - 養生雞煲火鍋 (已結業)

約左老公去尖沙咀新開的日本商店買嘢，之後再去山林道的尚上下夏養生雞煲火鍋食晚餐，老公喜歡佢地D雞煲夠入味，火煱配料夠新鮮。火鍋店設計擺設以懷舊為主，地方整潔。雞煲：有分全隻、雞胸、雞脾，辣度亦可分大中小辣或不辣，我們選了雞脾半份和小辣。雞是預先煮好，先用特製香料和醬料醃好，再用料頭爆香炆煮熟，上枱時只需煮幾下就食得，雞脾啖啖肉又入味，濃郁的醬汁調得甚惹味。食完就加湯食火鍋。生劏白鱔片：白鱔新鮮，只需灼一灼就可以，鮮味又爽脆。蝦膠釀鮮冬菇：蝦膠鮮甜彈牙，鮮冬菇也很爽口。鬼馬墨魚：即是墨魚滑釀油炸鬼，再在面上鋪滿蟹籽，多重口感又鮮味，油炸鬼吸收湯的味道，脆口中又帶湯汁的味道，好特別的感覺！