喜亭軒

营业中

休息中

今次食既放題係雞煲+澳洲和牛火鍋，一開始上既雞煲就揀左小辣，就算我同朋友唔食得辣都食到。服務員一開始就提醒我地可以叫左刺身先再等雞煲上，果然啲刺身質素都好好！三文魚腩同油甘魚油脂充足好香口，其他刺身都不過不失～～雞煲驚喜之處係有唔少海蔘，非常冧非常入味，而且食曬所有海蔘都唔覺得濟。啲雞都唔錯，唔係特別嫩但都唔鞋，主要係啲汁好惹味。記得上雞煲後要等多幾分鐘先好開始食雞，唔係既話可能會唔熟架。火鍋方面呢，雖然略嫌豬軟骨湯底同胡椒豬肚湯底既味道唔係好突出，但係火鍋食材真係做得唔錯又新鮮，連胡椒豬肚湯底既花膠都好食過其他火鍋放題既花膠哈哈。澳洲和牛雪花好靚，食落口的確好嫩又重牛味，不斷encore!! 豬同羊就不過不失咁啦，唔係特別出色。餐廳仲會送海鮮拼盤，同樣好味！丸類選擇多，唔多麵粉味。菜類都好新鮮綠油油，不過就冇火鍋必食既油麥菜啦。總結：呢個價錢食齊雞煲，刺身，火鍋仲有海鮮真係值回票價，而且餐廳服務都幾好，會教你點樣煮最好食，不妨一試。